ازيكم اخواتى حبايب قلبى وحشتوووونى جدا جدا بقالى كتير محطتش بصمة ليا بسبب انشغالى الشديد مع اولادى دعواتكم بالاعانه
المهم هدخل فالموضوع من فترة صغيرة عملت ماسك جديد لشعرى واستمريت عليه شهر وبصراحه كان اول مره استخدمه من باب التغيير وانعاش شعرى حبيبى هقولكم الماسك مكوناته ايه الاول
مكونات الماسك بيضة فرع صبار معلقة كبيرة زيت دابر املا معلقة كبيرة زيت جوز الهند منقوع فيه راس توم مدقوقة بالتوم بقشرها لمدة شهر على الاقل
هناخد فرعين او فرع على حسب حجم شعرك هنفتحها وناخد ال جواه بمعلقة
هنا شكل الصبار فى الطبق وباقى المكونات ال هنحتاجها فى الماسك
دا شكل الماسك النهائى
الماسك دا كنت بحطه كل اسبوع مره لمدة ساعتين او تلاته على جدور شعرى واطرافه بس يعنى مبغرقش شعرى كله الاهم انى اغرق جدور شعرى فهمتونى
ال حسيته من الماسك بعد نهاية الشهر ان الشعرايه مسكت نفسها وبقت شده حيلها وما شاء الله لمعه جميله اووووى وطرى جدا جدا ومعدل الهيشان خف كتير عن الاول وطبعا لو كنت استخدمته لمده اطول كنت هلاحظ فرق الطول لان من مكوناته التوم والتوم بلدوزر تطويل هو والبصل
=======================================
ندخل على الصبغه بقا
انا من الشخصيات ال مبحبش اصبغ شعرى كنت فترة من حياتى بصبغ الوان واشكال واحط وميهمنيش بس بصراحه لقيت ان الطبيعى فى كل حاجه يكسب لحد ما صدفة وانا بعمل سيرش توصلت لصبغ الشعر بالاسود عن طريق عشبة الكتم وانا من عشاق الشعر الاسود ومبحبش اغيره لاى لون تانى خلاص استقريت عليه
مكونات وصفة صبغ الشعر باللون الاسود بعشبة الكتم
ميرامية عشبة الكتم ويفضل يكون كتم ايرانى لانه من افضل انواع الكتم حنة
اول حاجه قبل ما نصبغ شعرنا بالكتم هنحنى شعرنا الاول قبلها بيوم وتانى يوم هنحط وصفة الكتم دى لمده لا تقل عن 3 ساعات
هنا كوبايتين مية على كبشة ميرامية خليتهم يغلو ربع ساعه
طلعولى كباية
هنا شكل عشبة الكتم وكباية الميرامية
ودى بعد العجن
وهنا بعد نص ساعه من التخمير طريقة الصبغة هتفرقي شعرك وتلبيسي جونتي لازم وتبداي توزيع خليط الصبغة علي كل خصلة من شعرك وتركزي علي مناطق الشعر الأبيض بعدين تغسيل شعرك بالمياه بس وبعد تلت ايام تقدري اغسليه بالشامبو عادي عشان بس اللون يثبت والشامبو ميوقعش اللون
=========================================
بالنسبة للنصائح المتبعة للعناية بالشعر والحفاظ عليه
1- انك تقللي استخدام مكواة الشعر قدر المستطاع وقبل ما تحبي تفردي شعرك بالمكوة تكوني لفها ساقيه قبلها بيوم دا بيسهل عملية الفرد وكمان مش بتحتاجي تعيدي عالخصله كتير
2-بعد كل حمام اخر شطفه للشعر تكون ب ميه ساقعه بيدي لمعه جميله ويقفل مسامات الشعر
3-عالاقل كل أسبوع تعملي حمام زيت لشعرك بنوع الزيت المناسب لشعرك وأفضلهم ملاءمة لجميع انواع الشعر زيت جوز الهند
4-عند تنشيف الشعر بعد الاستحمام نستخدم أسلوب الطبطبه وليس العصر
====================================
بالنسبة للروتين اليومي لشعري بسرحه مرتين اول ما اصحي وقبل ما أنام بعمله الكعكه ال قدام دي بتفرد الشعر وبتخليه جميل جداً بس مبشدوش جامد ويغسله مرتين فالاسبوع
============================== المشاكل ال واجهتني في شعري
طبعا التساقط خصوصا بعد الولاده وحليت المشكلة دي بعصير الجرجير كنت بحطه كل يوم قبل ما أنام علي فروة راسي والحمد لله فخلال أسبوعين كان شعري مبطل يقع
===============================
أفضل المنتجات ال استخدمتها لشعري ومقدرش استغني عنها
أهمهم شامبو وبلسم vo5 بكل أنواعه بجد شامبو فظيع وعملت موضوع عليه بحس انه خفيف عال شعر وريحته جميله وكمان طبعا حبيبنا كلنا زيت دابر أملا الأخضر وزيت الخردل الباكستاني روووووعه وبيطول الشعر وكمان زيت الزيتون ومنقوع فيه راسين توم مدقوقين بالهون بس الريحة صعبه شويتين تلاته
اتمني اكون أفدتكم ومتنسونيش من الدعاء بحسن الخاتمة